新手钓鱼教学 一般鱼饵勾法
 
之前收到唔少网友问我点样勾鱼饵, 作为一个半新手, 我都经历过相同嘅迷茫, 所以趁放假整左段短片, 希望对初初接触钓鱼嘅朋友有帮助。
 
短片最主要系示范四种常用嘅鱼饵︰生虾、虾仁、南极虾同埋青虫。
 
生虾
 
一般细嘅生虾(不大过成年人食指 size) 通常系勾虾腰。鱼食虾通常食虾头先，但如果勾虾头的话通常一勾只虾就会死，所以退而求次勾虾腰，等只虾冇咁易死之余D鱼食饵个阵可以快D食到只勾。
 
有D师兄会钟意勾虾尾，贪佢可以生猛D，但勾虾尾个阵D鱼食饵要忍下手，要等佢食到虾尾部份先抽绳，技术成份较高，所以向度略过不提。
 
虾仁
 
勾虾仁基本上冇乜特别要求，因应返只鱼勾嘅大细去勾返就可以，通常勾个阵都会将个勾收入虾肉入面，唔好露出黎就得。
 
南极虾
 
南极虾本身非常软，好容易散，所以勾个阵要好小心。勾南极虾个阵先将虾尾搣走，因为虾尾比较阻水，落到水会令到只虾漂得唔自然，所以要搣走。
 
拣南极虾个阵尽量都要拣只完整同靓仔嘅，特别系虾眼部份要留返，传闻D鱼会睇到南极虾只眼，所以会比较得食。
 
青虫/红虫
 
勾青虫同红虫个阵要特别小心佢个嘴，非常之利，我试过一捉上手佢即刻掉头咬我一野，手指即时见红，所以捉个阵要小心D。
 
勾青红虫通常会保持返佢个身系垂直唔好弯曲，睇起上黎比较自然，所以个勾尖要穿返出个虫身。
 
长度个度通常3 cm 左右就够, 想得食D可以落长D, 但鱼食饵嘅时间亦都会相对较长，食饵个阵要忍一忍手等佢吸到只勾先抽比较好。
 
以上四种鱼饵勾法嘅示范系我常用嘅勾法，坊间勾鱼饵嘅方法千变万化，有经验的钓手会因应钓场、目标鱼，甚至是鱼的活跃程度来改变鱼饵的勾法来作钓。
 
所以岩岩接触钓鱼嘅师兄师姐可以先作为参考，有时间的话亦都可以上网搵下资料睇下其他人嘅方法。先资料搜集，再搵机会实战，然後根据自已嘅经验同喜好去搵一套岩自已嘅钓法勾法，呢个亦都系钓鱼嘅其中一个乐趣。